In sa die chi l’ant fundadu, su Cussìgiu Natzionale de sos Secleros at postu in craru duas cosa de importu mannu:
- S’ùnica punna sua est sa de otènnere s’autonomia de su Szeklerland.
- Pro arribare a custu obietivu at a impreare petzi sos mèdios de sa lege e de sa democratzia.
Fiat craru dae s’incumintzu chi pro arribare a custu obietivu fiant netzessàrios fintzas sos mèdios de sa polìtica èstera; depimus fintzas impreare sas possibilidades ofertas dae sos tratados internatzionales. In su 2008, su Cussìgiu Natzionale de sos Secleros at isseberadu de aviare una legislatzione a livellu de s’UE in subra de sos deretos de sos pòpulos autòctonos e de sos grupos ètnicos chi istant in s’Unione Europea e, in piessignu, su deretu issoro a s’autodeterminatzione, “una legislatzione chi si depet basare in subra de sas racumandatziones 1201/1993, 1334/2003, 1811/2007 de su Cussìgiu de Europa, sa Carta Europea de s’Autonomia Regionale e sa detzisione de su Parlamentu Europeu pro su chi pertocat a sa tzitadinàntzia europea, adotada in su 21 de santandria de su 1991, e depet tratare su reconnoschimentu de totu sos deretos individuales e colletivos reconnotos dae sos istados membros de s’UE comente istandards internatzionales”.
A pustis de su concruu de su Tratadu de Lisbona fiat naturale pro nois su de chircare de impreare sa possibilidade de s’Initziativa de sos Tzitadinos, in pessu chi at a devènnere possìbile, e amus a chircare cumpàngios in totu s’Europa. Pro custa punna, su cussìgiu at adotadu duas risolutziones in su mese de làmpadas de su 2011, una chi mapat sas regiones natzionales alliadas potentziales e afirmat su printzìpiu de s’initziativa: sos pòpulos de s’Europa sunt uguales, e sa de duas, in prus de decrarare chi su Cussìgiu Natzionale de sos Secleros bolet impreare sa possibilidade de s’initziativa de sos tzitadinos europeos, fissat fintzas s'ogetu de s’initziativa.
Sa chistione est descrita a sa minuda in duos istùdios chi si podent agatare inoghe e inoghe.
Nos rendimus contu chi fintzas si sa populatzione totale de sas regiones natzionales europeas est rilevante, collire unu millione de firmas no at a èssere una faina fàtzile. B’at a èssere bisòngiu, pro bi resissire, de unu nùmeru de voluntàrios mannu meda.
Si ses de acordu cun sas punnas nostras, e pensas chi rispondat a s’interessu de sa pàtria tua, ma fintzas de totu s’Europa, chi sas regiones natzionales chi preservant caraterìsticas natzionales bèngiant afortiadas, sas cumpetèntzias issoro ismanniadas, e chi li bèngiat garantida un’indipendèntzia prus manna in manera chi potzant preservare sas traditziones istòricas issoro, chene subire in su mentres isvantàgiu econòmicu perunu, e cheres pigare parte in sa regorta de firmas, pro praghere compila custu moduleddu.
Su personale nostru t’at a cuntatare e t’at a informare de su chi b’at de fàghere.
Gràtzias in antìtzipu pro s’agiudu tuo.
Marosvásárhely, su 21 de abrile de su 2012
A nùmene de su Cussìgiu Natzionale de sos Secleros
Izsák Balázs
presidente